கலைஞர் கருணாநிதி உத்தரவை மதிக்காத தோணி.

நாட்டாமைக்கே நம்ம தோணி சொல்வது...இதெல்லாம் செல்லாது செல்லாது.

பாசக்கார தலைவர் பாராட்டு நாயகன் இளைஞர்களின் இதய நாயகன் என்றும் அசராமல் ஓடிக்கொண்டிருக்கும் இளைஞர் என்று இன்னும் பல அடுக்கு மொழிக்கு சொந்தக்காரரான கலைஞர் கருணாநிதி அவர்கள் காலம் காலமாக தமிழர்களின் பண்பாடாகவும் வழக்கமாகவும் கொண்டாடப்பட்டு வந்த தமிழ்ப் புத்தாண்டை மாற்றி அமைத்துவிட்டார். இதை பற்றி காரசாரமாக விவாதங்கள் கருத்துக்கள் வந்து மறைந்து விட்டன. மறையா சூரியன் தன் உத்தரவு மூலம் தமிழ் நாட்டு நண்பர்களின் தலைவிதியை மாற்றி விட்டார். ஆன்மீகத்தில் நம்பிக்கை இல்லை என சொல்லிக்கொண்டே தன் வீட்டில் ஆன்மீக வாதிகளை வைத்திருக்கும் இவரால் எப்படி ஒரு ஆன்மிகம் சம்பந்தப்பட்ட உலக மக்களின் நம்பிக்கையை மாற்ற முடியும்.

எனக்கு தெரிந்தளவில் மீனா ராசியில் இருந்து மேட ராசிக்கு இடம்பெயர்வதுதான் புதுவருடப்பிறப்பு. இது நம் பூட்டன் பூட்டிக்கு முன்னைய பல தலைமுறையில் இருந்து நம்பிக்கையின் வெளிப்பாடு என வரலாறு சொல்கின்றது. இந்த இடப்பெயர்வு தைப்பொங்கல் அன்று வருமா? அதேநேரம் வசந்த காலப் பிறப்பு தான் வருட பிறப்பு என்ற நம்பிக்கையில் பார்த்தால் அந்த கால மாற்றத்தை மாற்ற எந்த கொம்பனாலும் முடியாது? அப்படி இருக்கையில் இதை மாற்றிய கருணாநிதி.................?????

பாசத்தலைவர் என்ன சொன்னாலும் தமிழக மக்கள் மட்டுமே இந்த உத்தரவுக்கு கட்டுப்பட்டு நடக்கும் சூழ்நிலையில் இருக்கின்றார்களோ தெரியாது. இதில் எத்தனை பேருக்கு உடன்பாடோ என்பதும் தெரியாது. ஆனால் இலங்கையில் நாம் இவருக்கு கட்டுப்பட தேவையும் இல்லை. கட்டுப்படவும் இல்லை. வழக்கம் போல இன்று தமிழ் சிங்கள புத்தாண்டு எல்லா இடமும் சிறப்பாக கொண்டாடப்பட்டது.

இவை எல்லாம் ஒரு பக்கம் இருக்க தோணி கருணாநிதியின் கருத்துக்கு என்ன சொன்னார்??? பாவமப்பா கேப்டன்(நான் நம்ம விஜயகாந்தை சொல்லல) நேற்றைய தினம் இடம்பெற்ற ஐ.பி.எல் போட்டியில் வெற்றி பெற்றதன் பின்னர் இந்த வெற்றியை நாளை புத்தாண்டை கொண்டாட இருக்கும் தமிழர்களுக்கு சமர்பிக்கின்றேன் என பேட்டி அளித்துள்ளார். அதுவும் தமிழ் நாட்டில் வைத்து நம் தமிழினத்தலைவர் ஆட்சியில் இருக்கும் நிலையில். பாவமப்பா தோணி அவருக்கு யாரும் சொல்லவில்லை போல தமிழக முதல்வர் சரித்திரத்தையே மாற்றி அமைத்தவர் என்று. அல்லது தெரிந்தும் இதை சொன்னாரா யாருக்குத் தெரியும். காரணம் வரலாறு அதுதானே. ஒரு சின்ன சந்தேகம் அவருக்கு இருக்கும் தமிழ் நண்பர் யாரும் தன் ஆதங்கத்தை பிரபலமாக இருக்கும் இவர் மூலம் வந்தாலாவது கருணாநிதிக்கு இதுதான் சரித்திரம் இதுதான் வரலாறு இதுதான் நம்பிக்கை என்பதை சொல்லாமல் சொல்லி இருப்பாரோ?

எது எப்படியோ தமிழர்களையும் தாண்டி எல்லோரிடமும் ஏப்ரல் 14 தான் தமிழ் புத்தாண்டு என்று பதிந்துவிட்டது. இதை யாராலும் மாற்ற முடியாதது என்பதற்கு ஒரு சின்ன உதாரணமே இந்த சம்பவம்.....

அட என்னங்க இந்த புது வருடத்தில் ஒரு நல்ல காரியம் செய்யணும் என்பதற்காக கொளுத்திப்போடிருக்கேன் இனி இந்த வெடியை கையாள்வது உங்கள் இஸ்டம்...

Read More

சச்சின் மனிதனா?- ஒரு நியாயமான கேள்வி.

இன்று என் வாழ்வில் சாதித்த ஒரு திருப்தி ஆனால் நான் ஒன்றும் செய்யவில்லை நமக்கு பிடித்தவர்கள் சாதித்தால் அது நாம் சாதித்தது போல என்பதை உணர்கின்றேன். காலை பத்துமணிக்கு கண் விளித்ததே இன்று மாலை மூன்று மணிக்கு வானொலியில் இடம்பெறும் கற்றது கையளவு என்ற நிகழ்ச்சியை நான் தொகுத்து வழங்க வேண்டும் என்ற ஹிஷாம் அண்ணாவின் தொலைபேசி அழைப்ப்பினூடு. மாலை மூன்று மணிக்கு கலையகத்துள் நான் நுழையும் போது எங்கள் தொலைக்காட்சி மக்கர் செய்துகொண்டிருந்தது. உடனடியாக தொழில் நுட்பவியலாளர்களின் உதவியை நாடினேன்.(மாற்றுவதாக இருந்தால் அவர்களின் பகுதியில் இருக்கும் தொலைக்காட்சியில் தான் முதலில் மாற்ற வேண்டும்.) வழக்கமா தாமதப்படுத்தும் நம்மவர்கள் இன்று உடனே சரி செய்து விட்டனர்.

பார்த்தேன் கொஞ்சம் கவலை நம்ம சேவாக் ஆட்டம் இழந்திருந்தார். அட இன்று தென் ஆபிரிக்கா நாளாக்கும் என நினைத்து ஒரு நிமிடம் சென்றிருக்காது சச்சின்.கார்த்திக் இரண்டுபேரின் துடுப்பாட்டத்தை பார்க்கும் போது ஒரு நம்பிக்கை வந்தது இந்தியா முன்னூறு அடிப்பது உறுதி என எண்ணினேன். மிக வேகமான சச்சின் அதிரடி ஆட்டத்தினால் நான் எழுந்து வெளியில் கூட செல்லவில்லை. அப்படியே கட்டுண்டு பார்ப்பது போல பார்த்துக்கொண்டிருந்தேன். ஆனால் மனதுக்குள் ஒரு பயம் நான் எப்போதெல்லாம் இந்தியா விளையாடும் போட்டியை பார்ப்போம் என இருந்து பார்த்தாலும் அன்று அவர்கள் சொதப்புவர். இன்றும் அந்த பயம் தொற்றிக்கொண்டது. இருப்பினும் சச்சினின் அந்த அதிரடியை மட்டுமாவது ரசிக்கலாமே என்ற ரீதியில் பார்த்துக்கொண்டிருந்தேன். முப்பத்தேழாவது பந்தை சந்தித்த சச்சின் தன் ஸ்டைலில் ஒரு நான்கு ஓட்டத்தை தட்டி விட்டு தன் அரைசதத்தை பூர்த்திசெய்தார். மறுமுனையில் கார்த்திக் சச்சினுக்கு நல்ல ஒத்துழைப்பு நல்கினார்.

மிக வேகமான புயல் வேக ஆட்டத்தில் இந்தியாவின் வேகம் அதிகரித்தது. களத்தடுப்பு புலிகள் என்னும் தென் ஆபிரிக்க அணியினர் களத்தடுப்பில் பல இடங்களில் சொதப்பினர். ஒருவாறு பதினைந்து ஓவரில் இந்தியா நூறு ஓட்டங்களை தொட்டது. நானும் சந்தோசமாக ஸ்கோர் விபரங்களை வானொலியில் வழங்கிக்கொண்டிருந்தேன். அதிகமான நான்கு ஓட்டங்கள் பெறப்பட்டுக்கொண்டே இருந்தன. சச்சின் எழுபதுகளை எட்டியவுடன் என்மனதோ சச்சினின் சதம் இன்று உறுதி என சொல்லிக்கொண்டது. அதேநேரம் ஒரு சில முட்டாள்கள் யோசிப்பது போல சச்சின் சதம் போட்டால் இந்தியா தோற்றுவிடுமோ என அஞ்சிக்கொண்டும் இருந்தேன். வழக்கமான தொன்னூறுகளில் மெதுவாக ஆடுவது போல எல்லாம் இன்று சச்சினின் தயக்கம் வெளிப்படவில்லை. சரவெடி தொடர்ந்து கொண்டே இருந்தது. தொன்னூறில் போயடுவாரோ என்ற பயம் என்னுள். எந்த தயக்கமும் இன்றி சச்சின் ஒவ்வொரு ஓட்டங்களாக சேர்த்து தன் 46வது சதத்தை பூர்த்து செய்தார். அப்போது அதிக சதம் பெற்றவர்கள் வரிசையை தொலைக்காட்சியில் காட்டியபோது அட நெருங்க முடியுமா நம்ம தலைவரை என்ற பெருமிதம் என்னுள்.

சதம் கடந்த பின் சச்சினின் வேகம் இன்னும் அதிகரித்தது. எனக்கும் ஒரே குஷி.அடடா இன்றைக்கு நம்மள இந்த நேரம் வேலை செய்யப்போட்டிட்டான்களே அதுவும் மேட்ச் பார்த்து ஸ்கோர் சொல்வது நம்ம வேலை. எப்பூடி?? ஆட்டம் தொடர கார்த்திக் போக பதான் வந்து தன் வேலையை செய்துவிட்டு போக வந்தார் தலைவர். ஒரு பக்கம் சச்சின் வெளுத்துக்கொண்டிருக்க மறுபுறம் தோனியின் தாண்டவம் நடந்துகொண்டிருந்தது. ஆனால் தோனியின் தாண்டவம் இன்று எரிச்சலை தான் ஏற்படுத்தியது. ஒவ்வொரு பந்தையும் சச்சின் அடித்து நொறுக்கமாட்டாரா என்ற அவாவை தந்தது. பல பதிவர்கள் இந்த சாடலை சொல்லி இருந்தனர். ஆனால் கடைசி ஓவரில் தான் நான் இதை நினைத்து பெருமைபட்டேன். தோனியின் தாண்டவத்துக்கு வழிவிட்டதே சச்சின் என தோன்றியது. காரணம் அணிக்கு ஓட்ட வேகம் தேவை அதே போல சச்சினும் சாதனை படைக்க வேண்டும் என்றால் அப்படி. ஒருவேளை அணியின் ஓட்ட வேகத்தை அதிகரிக்கப்போய் சச்சின் பொல்லு போய்விட்டால் அதை தான் டோனி செய்ய சச்சின் மறுமுனையில் தன் பங்கை செய்துகொண்டிருக்கின்றார். இறுதிப்பந்துக்கு முதல் பந்தில் அடித்து விட்டு டோனி ஓட முற்பட சச்சின் தடுத்து விடுவார். அப்போதே உணர்ந்தேன் சச்சின் தோனியின் அடிகளை வரவேற்றுக்கொண்டுதான் தன் சாதனையை நெருங்கினார் என. அதேபோல சாதனைக்காக ஆடவில்லை என்பதையும் இதன் மூலம் நிரூபித்துவிட்டார்.

சச்சின் நூற்றியைம்பது தாண்டிய பின் தன் முன்னைய அதிகூடிய ஓட்ட எண்ணிக்கையை கடக்கமாட்டார என சிந்தித்தேன். இதற்கிடையில் மாலை ஐந்து மணியுடன் என் நிகழ்ச்சி முடிய அடுத்த நிகழ்ச்சிக்காக சந்துரு அண்ணாவிடம் கலையகத்தை ஒப்படைத்து விட்டு சென்றுவிட்டேன். இடையில் விமல் அண்ணாவிடம் இருந்து ஒரு தொலைபேசி அழைப்பு வந்தது. டேய் சச்சின் நூற்றி எழுபத்தொன்பது ரன்னடா இன்று எட்டுமணிக்கு விளையாட்டு திடல் நீதான் நான் சொல்றதையும் கணக்கில் எடு என்று சச்சின் இன்று கடந்த இன்னும் இரண்டு சாதனைகளை பகிர்ந்து கொண்டார்.(அவர் என்னுடன் பேசிய நேரம் மாலை ஐந்து முப்பது இருக்கும்.) இன்று சச்சின் தென் ஆபிரிக்காவிற்கு எதிராக ரிக்கி பாண்டிங் வைத்திருந்த மொத்த அதிகூடிய ஓட்டங்கள் என்ற சாதனையை முந்தி உள்ளார். அதேபோல தென் ஆபிரிக்காவிற்கு எதிராக ஒரு தனிநபர் பெற்ற அதிகூடிய ஓட்டங்கள் என சொல்லிவிட்டு வைத்துவிட்டார். மீண்டும் சற்று நேரத்தில் இன்னொரு அழைப்பு சச்சின் உலகசாதனை படைப்பார் போல தெரிகின்றது எனவே சச்சின் ஸ்கோரை கொஞ்சம் அதிகம் சொல்லும்படி சந்துரு அண்ணாவிடம் சொல்ல நம் அலுவகத்தில் அந்த பரபரப்பை உண்டாக்கினோம். எல்லோரும் ஸ்கோர் பார்ப்பதில் குறியாக இருக்க எனக்கும் செய்தி வாசிப்பதற்கான நேரம் வந்தது. இதற்கிடையில் தன் முன்னைய அதிகூடிய ஓட்டத்தையு சனத்தின் சாதனையையும் சச்சின் கடக்க எங்கள் எல்லோர் மனதிலும் அடுத்தது சாத்தியமா? என்ற கேள்வி. செய்தி ஆரம்பிக்க நான்கு நிமிடங்கள் இருக்கவே நான் கலையகள் சென்றுவிட்டேன் சச்சின் அந்த சாதனையை முறியடிப்பதை பார்ப்பாதர்க்காக.

அங்கெ சந்துரு அண்ணா எவ்வளவு முடியுமோ அவ்வளவுக்கு உடனடி ஸ்கோர் கொடுத்துக்கொண்டிருந்தார். அந்த கணம் சச்சின் நீண்டகாலமாக சயீத் அன்வர் வசமும் அதன் பின் கவின்றியினால் சமப்படுத்தப்பட்ட அந்த சாதனையை கடக்க எங்கள் உடலும் ஒருக்கம் பூரித்தது. சற்று நேரத்தில் என்னிடம் ஒப்படைத்து விட்டு செல்ல ஆறு மணிக்கு முன் அடிக்கமாட்டார என நான் ஏங்கினேன். இதற்கககவே எங்கள் செய்திப்பிரிவை சேர்ந்தவர்கள் விளையாட்டு செய்தியடிப்பதை தாமதமாக செய்யும் படி கேட்டவன் நான். ஆனால் சச்சின் நூற்று தொண்ணூற்றாறு. செய்தியும் ஆரம்பமானது. என் ஒரு கண் செய்தித்தாளில் இன்னொரு கண் சச்சின் அடிக்கமாட்டார என அடிக்கடி தொலைக்காட்சியை பார்த்தபடி. இந்த நிலையில் விளையாட்டு செய்தியுடன் செய்திப்பிரிவை சேர்ந்த அருண் உள்ளே வந்து சச்சின் எப்போது இருநூறு என்னும் புதிய கணக்கை ஆரம்பிப்பார் என காத்திருக்க இந்த தோனிப்பயல் விடவே இல்லை. தன் பங்குக்கு அடித்து துவைத்துக்கொண்டிருந்தார். என்ன செய்வது நானும் செய்தியை வாசித்து விட்டு எங்கள் நிலைய குறியிசையை ஒலிபரப்பிக்கொண்டிருக்கும் அந்த தருணத்தில் (உலகெங்கும் வெற்றி என்ற வரி அதில் வந்த நேரம். என்ன பொருத்தம்) சச்சின் அந்த சாத்தியமற்ற செயலை செய்து முடித்தார், இது சாதனையா. வழக்கம் போல கடவுளுக்கு நன்றி சொன்னது இந்த கிரிக்கெட்டின் கடவுள் இப்போது சொல்லுங்கள் இந்த சாதனையை செய்த சச்சின் மனிதனா அல்லது கடவுளா?

சேவாக் தன் வாயாலேயே இந்த ஆசையை வெளியில் சொல்லி இருந்தாலும் அவர் குரு அதை முதலில் செய்ய அதை ரசித்து கைதட்டியது இந்த சீடன். உண்மையில் இந்த போட்டியை இன்று பார்த்த அத்தனை பேரும் சரித்திரத்தில் இடம்பெறுவர். சரித்திரம் ஆரம்பித்திருக்கின்றது. புதுப்பயணம் தொடங்கி இருக்கின்றது. இந்த பாதையில் பலர் பயணிக்கலாம் ஆனால் இப்போது சாத்தியமில்லை. அப்படி சாத்தியமானாலும் இந்த சாதனை நாயகனின் பின்னால் மற்றவர் வருவர். சாதனையின் பின் கடவுளின் பின் அவர் பக்தர்கள் இருப்பது. சாதனைக்கு சாதனை சொந்தமாகாமல் போய் இருந்தால் தான் தப்பு. சேர வேண்டியவரிடம் சேர வேண்டியது சேர்ந்திருக்கின்றது. அப்புறம் என்ன நானும் விளையாட்டு திடலில் சச்சின் புராணம் பாடிவிட்டேன்.

சச்சின் உங்களுக்கு ஒன்று சொல்லணும் நான் இலங்கையில் இருந்து இதை எழுதி இருக்கேன், நான் இந்தியன் இல்லை ஆனால் நாடு மொழி கடந்து உங்கள் ரசிகன். ஏதோ என்வீட்டு கொண்டாட்டமாக கொண்டாடுகின்றேன். நீங்கள் எங்கள் வீட்டுப்பிள்ளை என்பது தான் நீங்கள் சாதித்த சாதனைகளில் பெரியது. வாழ்த்துக்கள் தலைவா.

Read More

சொதப்பல் ஆட்டம் ஆடிய இந்தியாவும் சாதித்து காட்டிய பாகிஸ்தானும்.

இங்கேயும் வெற்றி இல்லை.

இம்முறை நடைபெறும் ஐ.சி.சாம்பியன் கிண்ண தொடரின் மிக முக்கியமான போட்டியாக நடை பெற்ற போட்டியில் இந்திய பாகிஸ்தான் அணிகள் மோதின. சுவாரஷ்யத்துக்கு பஞ்சமில்லாமல் நடந்த போட்டியில் இந்தியா ஏமாற்றி விட்டது. நாணய சுழற்ச்சியில் பாகிஸ்தான் வென்றவுடன் முதலில் தாங்களே துடுப்பெடுத்தாடுவதாக அறிவித்தார் பாகிஸ்தான் அணித்தலைவர். காயத்திலிருந்து மீண்டு வந்த யூனுஸ், இந்த போட்டியில் எப்படியும் இந்தியாவிற்கு பதிலடி கொடுப்போம் என சொன்னதை சாதித்து காட்ட முதல் படியாக நாணய சுழற்சியில் வென்றார்.

துடுப்பாட்டத்தில் விட்டதை துடிப்பாக ஆடி ஈடுகட்டியவர்.

இம்ரான் நசீர்-கம்ரான் அக்மால் இணையை நீண்ட நேரம் நிலைக்கவிடாமல் நசீரை நெஹ்ரா அனுப்பி வைத்து இந்தியாவிற்கு நல்ல தொடக்கம் கொடுத்தார். தொடர்ந்து கம்ரான் அக்மாலையும் குறித்த இடைவெளியில் அவரே அனுப்பி வைக்க, அணித்தலைவர் யூனுஸ் கானை ஹர்பஜன் பார்த்துக்கொண்டார். நன்றாக போய் கொண்டிருந்த இந்த பயணத்தில் மாலிக் - முஹம்மத் யூசுப் ஜோடி இடியை கொடுக்க ஆரம்பித்தது. எந்த பந்து வீச்சாளராலும் இந்த இணையை பிரிக்க முடியாமல் போனது. இதற்குள் இந்திய அணியின் களத்தடுப்பு உலகத்தரம் வாய்ந்த ஒரு அணியிடம் இருக்க வேண்டிய களதடுப்பா இது என கேட்கவைத்தது. ஓட்டங்களை இவர்கள் பெற்றுக்கொடுக்க பாகிஸ்தானின் ஓட்ட எண்ணிக்கையும் அசுர வளர்ச்சி கண்டது. மாலிக் வழக்கம் போல இந்தியர்களை அடித்து துவைத்தார். மீண்டும் ஒரு சதம் கண்ட அவரின் துடுப்பாட்டம் மற்றவர்களுக்கு பாடமாக அமைந்தது. பெரிதும் எதிர்பார்க்கப்பட்ட அபிரிடி ஏமாற்ற பாகிஸ்தான் ஐம்பது ஓவர் முடிவில் ஓட்டங்களை பெற்றது.

இந்தியாவின் கனவை தகர்த்த ஜோடி.

நம் இந்தியர்கள் தான் துடுப்பாட்ட சூரர்களாச்சே. அதுவும் கம்பீரும் வந்திருக்கிறார் கலக்குவார் என்னும் நம்பிக்கையில் காத்திருக்க சச்சினும் கம்பீரும் நன்றாக தான் தொடங்கினர். ஆனால் வழக்கமாக முக்கிய ஆட்டங்களில் சொதப்பும் சச்சின் இங்கேயும் அந்த நோயை ஆரம்பித்தது வைத்தார். ஆனால் தொடர்ந்து வந்த திராவிட் நம்பிக்கை கொடுக்க அடித்து பிளந்து கொண்டிருந்தார் கம்பீர். திராவிட் ஆமை ஆட்டம் ஆட கம்பீர் அனல் பறக்கும் ஆட்டம் நம்பிக்கை தந்தது. அந்த நம்பிக்கை நெடுநேரம் நீடிக்கவில்லை. அநியாயமாக ரன் அவுட் முறையில் கம்பீர் வெளியேற இந்தியாவின் வெற்றியும் அவர்களை விட்டு வெளியேறி விட்டது. இருந்தாலும் இந்திய ரசிகனாக இன்னும் நம்ம தோணி,ரெய்னா,யுஸுப் எல்லாம் இருக்கிறார்களே பார்க்கலாம் என நானும் ஆவலாக இருந்தேன்.

மீண்டு வந்து பலியாகிய சூரர்.

ஷேவாக் இல்லாதது ஆரம்பத்தில் தெரிய இடை வரிசையில் ஆடும் யுவராஜ் வெளியேற அந்த இடத்துக்கு வந்த கோலி கலக்குவார் என நம்பி இருக்க ஓரளவிற்கு அடித்து ஆடினார். இந்த நிலையில் ஆமை வேகத்தில் இருந்து திராவிட் அதிரடிக்கு மாறினார். இதை பார்த்து தானும் அதிரடிக்கு மாறிய கோலியின் அனுபவமினமையால் அவரும் நடையைக் கட்டினார். தொடர்ந்து வந்த அணித்தலைவர் தனக்கும் போட்டிக்கும் சம்பந்தமில்லை என்பது போல உப்பு சப்பு இல்லாமல் ஆட நீங்கள் போய் வாருங்க என அபிரிடி அனுப்பி வைத்தார். அதன் பின் வந்த ரெய்னா டிராவிட்டுடன் இணைந்து வெற்றியை நோக்கி கொண்டுவந்தார். இருவரும் இணைந்து பாகிஸ்தானை பந்தாட திராவிட் தன அரை சதத்தை கடந்து தன்னை இவ்வளவு நாளும் ஒதுக்கி வைத்த தெரிவாளர்களுக்கு சாட்டைஅடி கொடுத்தார்.

தன் பங்குக்கு அசத்தியவர்.

ஆனால் இந்த சந்தோஷமும் நெடுநேரம் நீடிக்கவில்லை.ரெயினாவும் நாற்பத்தாறு ஓட்டங்களோடு வெளியேற கனவு களைய தொடங்கியது. அப்போதும் டிராவிட்க்கு யுஸுப் கை கொடுப்பார் என எதிர்பார்க்க கைவிட்டு விட்டார். இறுதி நம்பிக்க ஹர்பஜனிடம். அதை காப்பாற்றும் படி ஹர்பஜன் ஆடினாலும் மீண்டுமொருமுறை முட்டாள் ஆட்டமாடிய திராவிட் இம்முறை தன விக்கெட்டை பரிதாபமாக பறி கொடுத்து நடையைக் கட்டினார். அத்துடன் இந்தியா ஜெயிக்கும் எனும் கனவும் கலைய தொடங்கியது.

தன்னை ஒதுக்கியவர்களுக்கு சாட்டை கொடுத்து விட்டு கரை சேர்க்க முடியாமல் போனவர்.

மொத்தத்தில் நீண்ட நாட்களாக திட்டம் தீட்டியது மட்டுமன்றி இந்தியாவை இம்முறை கவிழ்ப்போம் என கூறிய பாகிஸ்தான் வீரர்கள் அதை சாதித்தும் காட்டி விட்டனர். ஆனால் இந்த போட்டியில் சச்சின் உட்பட இந்திய வீரர்கள் பொறுப்பற்ற சொதப்பல் ஆட்டமாடியதே தோல்விக்கு காரணமாக அமைந்து விட்டது. இல்லையேல் உலகின் முதல் நிலை அணி இப்படி மூஞ்சியில் கரி படும் படி தோற்றிருக்காது. மொத்தத்தில் இம்முறை கிண்ணம் யாருக்கு என்ற என் கணிப்புகளும் பொய்யாகி வருகின்றன.சிலவேளை பாகிஸ்தானோ ஏன் இங்கிலாந்தோ கிண்ணத்தை சுவீகரித்தலும் ஆச்சரியமில்லை.

Read More

வெற்றி-தோல்வி-டோனி.

என் கையில் எல்லாமே இருக்குதடா!

இந்திய அணியின் தலைவர் மகேந்திர சிங் தோனியை பற்றி எல்லோருக்கும் தெரியும். மிக்ச்சிறந்த விக்கெட் காப்பாளர் மட்டுமன்றி அணியை வெற்றிப்பாதையில் அழைத்துச் செல்லும் நல்ல துடுப்பாட்ட வீரர், இவை எல்லாவற்றுக்கும் மேல் இந்திய அணிக்கு தொடர் வெற்றிகளையும் T20 உலகக்கின்னத்தையும் பெற்றுக்கொடுத்த சாதனைத்தலைவர். இதெல்லாம் கடந்த உலகக்கிண்ண தொடர் வரை தான். அதற்கு பிறகு எல்லா நிலைமையும் மாறி விட்டது.

இந்த நிலை வந்து சேருமோ?

ஷேவாக் என்னும் அதிரடி அசகாய சூரன் இல்லாமல் தாங்கள் ஜெயிப்போம் என உலகக்கிண்ணத்தில் காலடி எடுத்து வைத்தவர்களுக்கு ஷேவாக் பிரச்சனை ஏனோ தாக்கத்தை ஏற்ப்படுத்தியது. கூல் தலைவர் என பெயரெடுத்த டோனி சூட்டு தலைவர் ஆனார். ஒருவாறு உப்புசப்பு அணிகளை வென்று சூப்பர் எட்டுக்குள் போன அணி இங்கிலாந்து ,மேற்கிந்திய தீவுகள் அணிகளிடம் வெல்லவேண்டிய, வெல்லக்கூடிய போட்டிகளில் தோல்வி அடைந்தது. அதுவும் இங்கிலாந்துடனான போட்டி மிகப்பெரிய சர்ச்சைக்குரிய ஒன்றாக மாறி இருந்தது. காரணம் இல்லாமல் இல்லை, அந்தப்போட்டியில் டோனி என்னும் மிகச்ச்சிறந்த தலைவன் மிகத்தவறான பல முடிவுகளை எடுத்தார். எல்லாவற்றிலும் மிகப்பெரிய தவறாக சுட்டிக்காட்டப்பட்டது ரவீந்தர் ஜடேயாவை தங்களுக்கு முன்னர் அனுப்பி டெஸ்ட் போட்டிபோல அவர் விளையாட அதன் பின் தான் வந்து ஜெயிக்கலாம் என போட்ட கணக்கே விமர்சிக்கப்பட்டது.

நான் கணக்கில புலி ஒருக்கா எனக்கு ஒருக்கா உனக்கு சரியா?

அதன்படியே வந்த டோனி இறுதி ஓவரில் செய்தது நினைவிருக்கும் T20ஐ பொறுத்தவரை அது ஒரு பெரிய ஓட்ட எண்ணிக்கை அல்ல. அப்படி இருப்பினும் டோனி மந்தமாக விளையாடி அணியை தோல்வி அடையச் செய்தார். தோனியின் தனிப்பட்ட துடுப்பாட்டம் தப்பாக அமைந்தாலும் அந்த போட்டியில் இந்தியா வென்றிருந்தால் ஜடேயாவை முதலே அனுப்பியது சரியென எல்லோரும் புகழ்ந்த்திருப்பர். காரணம் அந்த நேரம் விக்கெட் ஒன்று இழக்கப்பட்டாலே போட்டி படுதோல்வியில் முடிந்திருக்கும். இதை பல பதிவர்கள் பதிவு இட்டு விட்டனர். ஆனால் நான் இதை மீண்டும் சொன்னதுக்கு காரணம் என் இந்த பதிவின் அடித்தளமே இதுதான். இவை எல்லாம் முடிந்து ஆறி அடங்க முன்னமே மேற்கிந்திய தீவுகள் உடனான தொடர்.

வாழ்க்கை ஒரு வட்டம் இங்க தோற்கிறவன் ஜெயிப்பான் ஜெயிக்கிறவன் தோற்பான் ஆனால் இங்கே எல்லாமே என் கையில்

மீண்டும் ஷேவாக்,சச்சின்,சகீர்கான் போன்ற பெருந்தலைகள் இல்லாமல் பறந்தனர். முன்னமே சொல்லிவிட்டார் டோனி இந்தத்தொடரில் களங்கத்தை தீர்ப்போம் என. அதன்படியே முதல் போட்டியில் மலை என ஓட்டங்களை குவித்து வெற்றி பெற்றனர். இரண்டாவது போட்டியில் பதிலடி கொடுத்தது மேற்கிந்திய தீவுகள். தொடரின் முன்னிலையை தீர்மானிக்கப்போகும் போட்டியில் இந்தியா தடுமாற தோணி போல மீட்டெடுத்தார் டோனி. இறுதிவரை தன கைகளிலேயே போட்டியை வைத்திருந்து இந்தியாவிற்கு வெற்றியை பெற்றுக்கொடுத்தார். அடுத்த போட்டியும் மழையால் கைவிடப்பட முதன் முறையாக மேற்கிந்திய மண்ணில் ஒருநாள் சரவதேச தொடர் வெற்றி ஒன்றை பதிந்தது இந்தியா. T20இல விட்ட கோட்டையை இங்கே சரி செய்தனர்.

இந்த படத்துக்கு கருத்து போட என்னால முடியல நீங்கள் முயற்சி செய்து பாருங்க.

இதெல்லாம் எங்களுக்கு தெரியும் தானே ஏண்டா இதையே சொல்லி கொல்லுறாய் என திட்டாதிங்க. இதுதாங்க விடயமே. இதே டோனி தானே T20 உலகக்கிண்ணத்தில் சொதப்போ சொதப்பென சொதப்பினார். அதுவும் மிக இலகுவாக வெல்லவேண்டிய போட்டியைக்கூட தன் கையாலேயே தாரை வார்த்த்துக்கொடுத்தார். ஒருவேளை இம்முறை பாகிஸ்தான் தான் சாம்பியன் ஆக வேண்டுமென இவரே கணக்குப்போட்டு விட்டாரா? ஐம்பது ஓவர்கள் கொண்ட போட்டியில் இறுதி ஓவரில் அப்படி ஆடி வெற்றி பெற்றுக்கொடுத்த தோனியால் ஏன் T20 போட்டியில் அதுவும் அனல் பறக்கும் ஆட்டம் ஆடும் அந்தப்போட்டியில் முடியாமல் போனது.

நினைத்ததை நடத்தியே முடிப்பவன் நான்.

இதற்கெல்லாம் ஒரே காரணம் தான் இருக்கமுடியும். வழக்கமான இந்திய அணியின் நட்சத்திரங்களுக்கு வந்திருக்கும் கௌரவப் பிரச்சனையே என்பதே என் கருத்து.(இது என் கருத்து தாங்கோ மறுக்கிறவங்க பின்னூட்டத்தில் என்னை துவைத்தெடுங்கோ) அதாவது தான் நினைத்தால் இந்தியாவை வெல்ல வைக்கமுடியும் அதே நேரம் தோற்கவைக்கவும் முடியும் என்பதை டோனி யாருக்கோ சொல்லி இருக்கின்றார். தோனியை இப்படி சொல்ல வைத்தவர்களே கொஞ்சம் யோசித்து பாருங்கள் உங்கள் வீண் விளையாட்டு இம்முறை உலகக்கிண்ணத்தை எடுக்க தகுதியான அணியாக இருந்த ஒரு அணியை செத்த பாம்பாக்கி இருக்கின்றது. அதே நேரம் சச்சின், ஷேவாக் இல்லாமல் கூட இந்திய அணி வெல்லும் நான் திட்டம் போட்டால் என்பதோடு நான் இல்லாவிட்டால் வெல்லவே வெல்லாது என்பதைக்கூட கும்ப்ளே தலைவராக இருந்த போது நடைபெற்ற இலங்கைத்தொடரின் போது அதையும் நிரூபித்தார்.(என் டோனி ஒரு மந்திரவாதியா என்னும் பதிவை வாசித்து பாருங்கள் புரியும்http://sshathiesh.blogspot.com/2009/05/blog-post_10.html)

எதுவாக இருப்பினும் இப்போது நடக்கும் நிகழ்வுகளை பார்த்தால் டோனி ஒரு மந்திரவாதி மட்டுமல்ல இந்திய அணியின் வெற்றி தோல்விகள் தீர்மானிக்கும் சக்தியும் அவரே என்பது தான் என் கருத்து. இதற்கு மாற்றுக்கருத்து இருப்பவர்களும் உங்கள் கருத்தை தாராளமாக சொல்லுங்கள். அதேநேரம் என் கருத்தோடு ஒத்துப்போனால் அதையும் சொல்லிவிட்டு போங்கள்.

Read More

டோனி ஒரு மந்திரவாதியா?

இந்திய அணியின் தலைவரும் தற்போதுள்ள சிறந்த துடுப்பாட்ட வீரர்களில் ஒருவரான மகேந்திர சிங் டோனி. குறுகிய காலத்திலேயே அணித்தலைவராக சாதித்துக் காட்டிய டோனியை பற்றித்தான் பலரது பேச்சும் இருக்கிறது. தான் தலைமைப் பொறுப்பை ஏற்ற முதல் தொடரிலேயே கனவாக இருந்த இருபதுக்கு இருபது உலகக்கிண்ணத்தை பெற்றுக்கொண்டு வந்தார்.

கங்குலி, திராவிட் கலந்த தலைமைத்துவம் தான் இவரின் ஸ்டைல். தேவைப்படும் பொது கங்குலி போல் அதிரடி முடிவெடுப்பவர் பல இடங்களில் சாதுவாக இருந்தே சாதித்துக்காட்டினார். ஒரு வித்தியாசமான சிறந்த வீரர் தான் கடலில் தத்தளித்துக்கொண்டு இருந்த இந்திய அணியினரை தோணியைப்போல் காப்பாற்றி கரை சேர்த்துக்கொண்டு இருப்பவர்தான் டோனி.

சச்சின் மட்டுமன்றி உலக ஜாம்பவான்களே இவரது தலைமைப் பொறுப்பை பார்த்து வியந்து நிற்கின்றனர். இந்த நேரத்தில் தான் எனக்கு டோனி ஒரு மந்திரவாதியா என எண்ணத் தோன்றுகின்றது. காரணமும் இல்லாமல் இல்லை. அணில் கும்ப்ளேயின் இறுதித் தொடர் என நினைக்கின்றேன் கும்ப்ளேயின் தலைமையில் வெற்றிபெறாமல் கொஞ்சம் தடுமாறி தடுமாறி வெற்றியை நோக்கிச் சென்ற அதே வீரர்களை கொண்ட இந்திய அணி அடுத்த போட்டியிலேயே டோனி தலைமையிலேயே இலகுவாக வெற்றி பெறுகின்றது. நான் நினைத்ததில் என்ன தப்பு.

அதன் பின் ஒரு போட்டியில் சேவாகின் தலைமையில் தடுமாறி போட்டியை சமநிலையில் முடித்த அதே அணி மீண்டும் எழுந்து டோனி தலைமையில் மிகப்பெரிய வெற்றி.

இன்று ஐ.பி.எல்.போட்டிகளில் ஆரம்பத்தில் தடுமாறிய சென்னை சுப்பர் கிங்க்ஸ் அணி இப்போது வெற்றிமேல் வெற்றி குவித்து புள்ளிகளின் அடிப்படையில் முதல்நிலையை அடைந்து இருக்கிறது. இதற்க்கெல்லாம் காரணம் என்ன? டோனி தொட்டால் மட்டும் துலங்கும் எல்லாம் மற்றவர்கள் தொடும்போது ஏன் துலங்கவில்லை? விடை சொல்வது கஷ்டம்தான்.

டோனி ஒரு மந்திரவாதியா? அல்லது ஏதும் மாயாஜாலம் செய்து வெற்றியை பெறுகிறாரா? அல்லது எப்பிடித்தான் வெற்றியை அடைகின்றாரோ?
நிச்சயமாக தோனியை சூழ்ந்து இருக்கும் அதிஷ்டதேவதை ஒரு பக்கம் வெற்றி அலையை வீசிக்கொண்டிருக்க தோனியின் ஆளுமை, சிந்திக்கும் திறன், விளையாட்டின் மேல் கொண்ட ஈடுபாடு, களத்தில் எடுக்கும் முடிவுகள், வகுக்கும் வியூகங்கள், மர்ரவீரர்களையும் மதித்தல் முக்கியமாக எல்லோரையும் ஊக்கப்படுத்தி ஒரே அணியாக விளையாட வைத்தல் என்பவைதான் தோனியின் மந்திரங்கள் என நினைக்கின்றேன்.

உலகக்கிண்ணம்(இருபதுக்கு இருபது), கடந்த ஐ.பி.எல், அதன்பின் தொடர்ந்த இந்திய அணியின் சாதனை வெற்றித் தொடர்கள் இன்று நடைபெறும் ஐ.பி.எல்லிலும் தொடர்ந்து உலகக்கிண்ணத்திலும் தொடருமென நினைக்கின்றேன். திறமையும் அதிஷ்டமும் இருந்தால் டோனி என்ன நீங்களும் மந்திரவாதி ஆகலாம்.

இந்த சந்தேகம் எனக்கு மட்டுமன்றி உங்களிடமும் இருந்திருக்குமென நினைக்கின்றேன். நீங்கள் என்ன நினைக்கிறீர்கள் என தட்டிவிடுங்களேன்.

Read More